«Архив–Музей–Кітапхана» цифрлық экожүйесіндегі архивтік құжат: историографиялық талдау және институционалдық шекараларды қайта пайымдау

Аңдатпа

Мақала архивтерді, кітапханаларды және музейлерді (LAM/GLAM) біріктіретін мәдени мұраның цифрлық экожүйесінің қалыптасуы жағдайында архивтік құжат мәртебесінің өзгеруі туралы теориялық тәсілдерді тарихнамалық талдауға арналған. Зерттеудің мақсаты – цифрландырудың аталған институттардың институционалдық конвергенциясына алып келетін немесе олардың теориялық әрі кәсіби ерекшелігін сақтай отырып, өзара іс-қимылының жаңа модельдерін қалыптастыратынын анықтау. Әдіснамалық негізін тарихи-генетикалық, салыстырмалы және концептуалдық талдау, сондай-ақ архивтану, ақпараттық ғылымдар және мәдени жады зерттеулерін біріктіретін пәнаралық тәсіл құрайды. Жұмыста архивтанудың классикалық және заманауи теориялары, cultural memory және memory institutions тұжырымдамалары, сондай-ақ цифрлық платформалардың тәжірибелері қарастырылады. Зерттеу нәтижелері көрсеткендей, цифрлық технологиялардың, интеграцияланған платформалардың және біріздендірілген метадеректердің дамуына қарамастан, архивтер, кітапханалар мен музейлер өздерінің қорларының табиғатына, ұйымдастыру қағидаттарына және кәсіби тәжірибелеріне байланысты негізгі айырмашылықтарын сақтайды. Цифрлық ақпараттық жүйелерге тән деректер логикасы мен архивтік теорияның негізін құрайтын шығу тегі қағидаты арасындағы қайшылық анықталды. Конвергенция тұжырымдамасына балама ретінде архивтерді, кітапханалар мен музейлерді интеграция инфрақұрылымдар мен деректер деңгейінде жүзеге асырылатын, бірақ институционалдық саралану сақталатын үлестірілген цифрлық экожүйенің элементтері ретінде қарастыру ұсынылады.