Архив ісі және басқаруды құжаттамалық қамтамасыз ету саласындағы әдістемелік құжаттар: әзірлеу ерекшеліктері

Аңдатпа

Мақалада архив саласындағы әдістемелік құжаттарды әзірлеудің теориялық-әдіснамалық және ұйымдастырушылық-практикалық аспектілері қарастырылады. Қазақстан Республикасының нормативтік құқықтық актілерді, ұлттық және мемлекетаралық стандарттарды, сондай-ақ Қазақстан Республикасы Президентінің Архиві әдістемелік материалдарды әзірлеудегі қалыптасқан тәжірибесін талдау негізінде әдістемелік құжаттар түрлерінің сыныптауы негізделіп, оларды дайындау алгоритмі ұсынылды және типтік қателер анықталды. Әдістемелік құжаттар архивтік қызмет процестерін стандарттаудың, білім сабақтастығының және саланың жаңа технологиялық жағдайларға бейімделуінің құралы ретінде көрсетілген. Зерттеудің өзектілігі «цифрлық мемлекетке» жүйелі түрде көшу жағдайында қарқынды өзгеріп жатқан нормативтік-құқықтық база мен архившілер жұмысының практикалық әдістері арасындағы алшақтықты жою қажеттілігімен байланысты. Қазақстан Республикасы Президентінің Архиві тек мемлекеттік архив қана емес, сонымен бірге саланың әдіснамалық орталығы ретіндегі институционалдық рөлі зерттеуге ерекше маңыз береді. Әдістемелік материалдарды дайындаудың бірыңғай стандарттарын әзірлеу мекеменің ішкі процестерін жүйелеуге ғана емес, сонымен қатар құжаттық мұрамен жұмыс істеу кезіндегі әдіснамалық бұрмалану қаупін азайта отырып, озық тәжірибені еліміздің барлық мемлекеттік архивтер желісіне таратуға мүмкіндік береді.