Қазақстан Республикасының архивтері мен кітапханалары жаһандық цифрлық кеңістікте

Аңдатпа

Бүгінгі таңда әлемдік деңгейде дамыған «цифрлық қоғам» ақпараттық кітапхана және архив ісін дамыту болашағына айтарлықтай әсер етуде. Цифрлық ақпараттық кеңістікті қалыптастыруда кітапхана мен архив қорларының рөлі мен орны жоғары. Демек, электронды кітапханалар және архив желісін құрудың маңыздылығы зор. Бүгінгі таңда цифрлық кітапханалардың және архивтердің қызметі ғылым мен техниканың әртүрлі салаларының мекемелері мен ұйымдары есебінен артып келеді. Мақаладағы «электрондық құжаттың» мазмұны ғалымдардың теорияларымен салыстырылады. Жаңартылған білім беру мазмұны жағдайында ақпараттық мәдениетті арттыру, оқу дағдыларын меңгеруге көмектесетін цифрлық кітапханалар мен архивтердің маңыздылығын арттыру, өз бетінше білім алуды тереңдету басты міндеттердің бірі болып табылады. «Цифрлық Қазақстан» мемлекеттік бағдарламасын іске асыру шеңберінде Ұлттық академиялық кітапхана мақсаты адами капиталды дамыту болып табылатын халықаралық келісімдер мен келісімшарттарға қол қойды. Жаһандық ақпараттық кеңістікте қазақстандық кітапханалар мен архивтердің ақпараттық ресурстарын халықаралық ақпараттық желілермен интеграциялау Қазақстан аймақтары мен шет мемлекеттер арасында тікелей ақпараттық байланыстарды орнатуға бағытталғаны мемлекеттік құжаттарда қарастырылған.