Ұлы Отан соғысы жылдарында беларус жеріндегі қазақстандықтардың ерлігін зерттеуде ақпараттық ресурстарды пайдалану

Аңдатпа

Бұл мақалада Ұлы Отан соғысы жылдарында жауынгердің майдандық жолын бақылауға немесе оның тағдыры туралы мәліметтерді табуға мүмкіндік беретін интернет-ресурстар мен іздеу жүйелеріне шолу жасалған. Беларусь жеріндегі партизандық қозғалысқа қатысқан қазақстандықтардың тағдырын зерттеу «Қазақстандықтар Ұлы Отан соғысы жылдарында Беларусьтегі партизандық қозғалыста» атты жоба аясында белсенді түрде жүргізілуде. Беларусь Республикасының Ұлттық архиві партизандық қозғалысқа қатысушылар туралы ақпараттық портал ашты. Бұл портал арқылы Беларусь аумағындағы партизандық бірлестіктер құрамында болған мың жарымға жуық қазақстандық жайлы мәліметтерді іздеуге мүмкіндік туады. Ғылыми ізденіс нәтижелері ғылыми журналдар мен конференция материалдарында жарияланып, апробациядан өтті. Іздеу жүйесі жұмысы барысында Ақмола облысының тумасы, Жуанышпаевтар әулетінен шыққан төрт ағайындылардың бірі жерленген жері нақтыланып, табылды. Ол жауынгер Витебск облысы, Шапуры ауылындағы бауырластар зиратына жерленген. Л.Н. Гумилев атындағы Еуразия ұлттық университетінің делегациясы сол зиратқа барып, жауынгердің туған жері – Ақмола облысы, Еңбекшілдер ауданына бір уыс топырақ алып келген.