«…Халық пен Абай арасы күшті махаббатпен жалғасар» (А. Құнанбайұлының 180 жылдығына орай)

Аңдатпа

Мақалада ұлы ақын және ағартушы Абай Құнанбайұлының 180 жылдығына орай, оның мұрасының қазіргі қоғамдағы өзектілігі баяндалады. Мақала атауы Алаш қайраткері Міржақып Дулатовтың көреген сөздерінде айтылғандай ақын мұрасы мен халық арасындағы үзілмес рухани байланысты айқындайтын лейтмотив ретінде қызмет атқарады және бұл байланыс жылдар өткен сайын нығая түсуде. Авторлар XX ғасырдың басынан бастап, Абайтану ғылыми тұрғыдан институционалдық негізге ие болған кеңестік кезеңге дейінгі аралықты қамтыған Абай шығармашылығын зерттеу мен насихаттау тарихына қысқаша шолу ұсынады. Ұлы ойшылды әлемдік мәдениет тұғырына көтерген Мұхтар Әуезовтің «Абай жолы» романэпопеясының негізгі рөліне ерекше назар аударылады. Мақаланың басты мақсаты – Қазақстан Республикасы Президенті Архивінде сақтаулы тұрған маңызды тарихи құжат – Ғ. Мұстафиннің баянхатымен ғылыми айналымды толықтыру. Онда 1944 жылы, ел үшін ауыр соғыс жылдарында, Абайдың 100 жылдық мерейтойына дайындықтың толық мәліметтері ашылады. Осылайша, мақалада тек Абай мұрасын насихаттаудың жолдары мен бағыттары ғана қарастырылмайды, сонымен бірге мемлекеттің көптеген жылдар бойы оның тұлғасына және шығармашылығына деген терең құрметін көрсетеді.