Хакатонды өткізу технологиясы «Archive Hack: ақылды Архив»– тәжірибе және сын-қатерлер

Аңдатпа

Соңғы жылдары архив ісі деректерді цифрландыру, автоматтандыру және мәдени мұра материалдарына қолжетімділікті жақсарту қажеттілігіне байланысты елеулі өзгерістерге ұшырауда. Осы заманғы сын-қатерлерге және архив ісіне инновациялар енгізу қажеттілігіне жауап ретінде Қазақстан Республикасы Президентінің Архиві Satbayev University-мен бірлесіп «Archive Hack: Ақылды архив» хакатонын ұйымдастырды. Бұл іс-шара талантты әзірлеушілерді, мектеп оқушыларын және студенттерді архив деректерін цифрландыру, каталогтау және визуализациялау процестерін жақсартуға бағытталған инновациялық шешімдер жасау үшін біріктірді. Мақалада хакатон өткізу тәжірибесі, оның кезеңдері, нәтижелері, кездескен қиындықтары және мұндай іс-шаралардың болашақтағы даму мүмкіндіктері қарастырылады. Мақала архивистерге, цифрландыру және мәдени мұра саласындағы зерттеушілерге, әзірлеушілерге және архивтік деректерді басқару мен сақтаудың жаңа әдістеріне қызығушылық танытқан мамандарға қызықты болады.