Қазақстан мен Франция серіктестігі: мәдени дипломатия тарихынан

Аңдатпа

Мақала Францияның Ұлттық мұрағатынан табылған, аса көрнекті қазақ әншісі Бибігүл Төлегенованың шығармашылық жолын баяндайтын «La Femme Soviétique» мерзімді басылымындағы (1968 жыл, № 12 және 1971 жыл, № 2) француз тіліндегі екі жарияланымға тарихи-археографиялық талдау жасауға арналған. Зерттеу археография мен кеңес-француз дипломатиялық қатынастары аясындағы қазақ-француз мәдени байланыстары тарихының тоғысында жүргізілді. Мәтіндерге сыни талдау жасау негізінде мәдени дипломатия призмасы арқылы шетелдік французтілді оқырманға Б. Төлегенованың бейнесі қалай жеткізілгені көрсетілген. Бұл жарияланым, сонымен бірге, ХХ ғасырдағы Қазақстанның мәдени өмірінің кейбір қырларын ашатын жеке тектік дереккөздерді археографиялық тұрғыдан өзектендіру болып табылады. Құжаттар Б. Төлегенованың өмірбаяндық мәліметтерімен ғана емес, сонымен қатар Қазақстанның мәдени дипломатиясының дамуы туралы деректерімен де құнды. Мәтіндерді археографиялық өңдеу француз тілінен қазақ тіліне аударуды, нақты деректерді айқындауды, атап айтқанда, мәтінде есімдері аталған өнер қайраткерлерін сәйкестендіруді және оқиғаларды мәнмәтіндік тұрғыдан саралауды қамтиды. Жарияланым Қазақстанның мәдениет тарихы бойынша деректік базаны кеңейтуге және құжаттық мұра негізінде қазақ-француз мәдени-гуманитарлық байланыстарын зерделеуге бағытталған.