Құқықтық мемлекет жағдайындағы конституционализм мен заңдылық: практикалық аспектілері

Аңдатпа

Мақалада әкімшілік рәсімдік - іс жүргізу заңнамасы мысалында конституциялық пен заңдылық қағидаттарын іс жүзінде жүзеге асырудың проблемалық мәселелері қарастырылады. Қазақстан Республикасының Әкімшілік рәсімдік-процессуалдық кодексінің нормаларын соттардың қолдануындағы кейбір қайшылықтарға, олардың бірі – әкімшілік рәсім принциптерінің бірі болып табылатын қатысушының сенім құқығын қорғау принципінің мәні мен жүзеге асу тәртібіне арнайы назар аударылды. Іс жүзінде сот ісін жүргізу барысында жеке және заңды тұлғалардың құқықтарына басымдық беретін сенім құқығын қорғау қағидаты қолданылатыны анықталды, өйткені заңсыз бірақ қолайлы құқықтық актіні төрт жағдайда ғана жоюға болады. Нәтижесінде, соттар үшін Конституция мен «Қазақстан Республикасындағы сот жүйесі және судьялардың мәртебесі туралы» Конституциялық заңда бекітілген заңдылық принципі ешқандай ерекшеліктерді көздемейтін үстем құқықтық норма болып табылғанымен, қазіргі таңда заңдылық принципі әкімшілік рәсімде де, әкімшілік сот ісін жүргізуде де мызғымас ұстаным ретінде сақталып отырған жоқ.