Батыс Қазақстанда қуғын-сүргінге ұшыраған Хасан Нұрмұхамедов

Аңдатпа

Саяси қуғын-сүргін құрбандарын толық ақтау жөніндегі мемлекеттік комиссия республикамыздың барлық өңірлерінде үш жыл көлемінде тыңғылықты жұмыс жасап, көптеген жылдардан бері құпия архивтердегі материалдарды саралап, жан-жақты зерттеп, Кеңестік заманның ақтаңдақтарын тарихи айналымға шығарды. Батыс Қазақстан облыстық мемлекеттік архивінде сақталған «сайлау пұрсатынан ажырату» бойынша істерді қарап, діни тұлғалардың құжаттарын тауып, танысып – 1920–1940 жж. аралығындағы мерзімді басылым материалдарын саралап, репрессия құрбандарының ұрпақтарын тауып, естеліктерін жинақтау нәтижесінде қуғынға ұшыраған дін қайраткерлерінің бірыңғай тізімі жасалды. 1001-дін қайраткерлері жинақталған архив құжаттарынан «Сенім үшін сергелдең» атауымен жинақ шығарылды. Батыс Қазақстан өңірінде қудалауға ұшыраған дін өкілдері – хазірет-ишандар тағдырлары, өмірдеректері жинақталған. Аталған хазіреттердің біразы ХХ ғ. басындағы қоғамдың-саяси оқиғалардың белортасында жүрген, Ресейдегі Мұсылмандар, Жалпықазақ съездеріне қатысқан, Алаштың идеясын қолдап халқына адал қызмет еткен жандар еді.