Редакциялық саясат

«Жаңа Архив» ғылыми-әдістемелік журналының

редакциялық саясаты

1. Жалпы ережелер

1.1. «Жаңа Архив» ғылыми-әдістемелік журналының (бұдан әрі – Журнал) құрылтайшысы және баспагері «Қазақстан Республикасы Президентінің Архиві» республикалық мемлекеттік мекемесі (бұдан әрі – Архив) болып табылады.

1.2. Журнал Қазақстан Республикасы Мәдениет және ақпарат министрлігінің Ақпарат комитетінде тіркелген (2022 жылғы 23 қыркүйектегі № KZ29VPY00056058 мерзімді баспасөз басылымын тіркеу туралы куәлік).

1.3. Журналдың баспа нұсқасының индексі бар және мерзімді басылымдардың халықаралық бірыңғай дерекқорына (ISSN 2958 6593) енгізілген, бұл ол туралы ақпараттың тиісті халықаралық реферативтік басылымдарда қамтамасыз етілуін білдіреді.

1.4. Журналда Архив қызметкерлері алған ғылыми және қолданбалы зерттеулердің нәтижелері, сондай-ақ Қазақстан Республикасының және шет мемлекеттердің ғылыми және білім беру мекемелерінің ғалымдары, сарапшылары, магистранттары мен докторанттарының, ізденушілерінің танымдық, ағартушылық және ақпараттық сипаттағы мақалалары, шолулары мен хабарламалары жарияланады.

1.5. Журналдың шығу мерзімділігі – жылына 4 нөмір.

2. Журналдың мақсаттары мен міндеттері

2.1. «Жаңа Архив» журналы – ашық қолжетімді кәсіби басылым. Журнал архившілерге, құжаттанушыларға, тарихшыларға, деректанушыларға, зерттеушілерге, оқытушыларға, магистранттар мен студенттерге арналған. Журнал отандық және шетелдік мамандардың кәсіби өзара іс-қимылын қамтамасыз етеді. Журнал ғылыми зерттеулердің нәтижелерін мақалалар, талдамалық шолулар, есептер түрінде, сондай-ақ басылымның тақырыптық бағыттары бойынша әдістемелік материалдарды жариялайды.

2.2. Журналдың миссиясы – отандық және халықаралық архивтану мен құжаттануды дамытуға, архив ісі, басқаруды құжаттамалық қамтамасыз ету және тарихи-құжаттық зерттеулер саласындағы ғылыми білім мен әдістемелік тәсілдерді ілгерілетуге ықпал ету. Журнал архивтік дереккөздерге қолжетімділікті кеңейтуге және ұлттық құжаттық мұраны танымал етуге ұмтылады.

2.3. Журналдың мақсаты – архивтану, құжаттану, архив ісінің тарихы мен практикасы, іс жүргізу, архив ісі саласындағы ақпараттық жүйелер мен технологиялар, тұлғатану, деректану, отандық тарих, тарихнама, археография, өлкетану саласындағы ғылыми-практикалық зерттеулердің нәтижелері туралы өзекті ғылыми білімді, шынайы мәліметтерді тарату. Бұл зерттеулер заманауи сыни тәсілдерге және тарихи мен қазіргі заманғы процестерді жан-жақты пайымдауға ықпал ететін түрлі дереккөздер мен архивтік деректерді пайдалануға негізделген.

2.4. Журналдың міндеттері:

архив ғылымының теориялық және қолданбалы аспектілерін дамытуға ықпал ететін архивтану мен құжаттанудың өзекті мәселелерін жариялау;

нормативтік өзгерістерді, халықаралық ынтымақтастықты, ғылыми конференциялар мен жаңа басылымдарды қоса алғанда, архив саласының дамуындағы өзекті оқиғалар мен үрдістерді талдау;

заманауи цифрлық технологияларды, әдістемелік әзірлемелерді және архивтік құжаттарды жинақтау, сақтау, есепке алу, цифрландыру және пайдалану саласындағы инновациялық шешімдерді ескере отырып, архивтік практиканың озық тәжірибесін жинақтау және тарату;

архивтік қорлар мен құжаттық мұраны танымал ету, олардың зерттеушілер, оқытушылар, студенттер және қалың жұртшылық үшін қолжетімділігіне ықпал ету;

архив саласы қызметкерлерінің, бейінді бағыттағы жоғары оқу орындарының оқытушылары мен білім алушыларының кәсіби деңгейін арттыруға бағытталған ғылыми және ғылыми-әдістемелік материалдарды жариялау;

ұлттық тарихи-мәдени жадыны сақтауға және ілгерілетуге, Қазақстан тарихының деректану базасы мен құжаттық айғақтарын зерттеуге деген қызығушылықты қалыптастыруға ықпал ету.

3. Басылымның басқарушы

және үйлестіруші органдары мен олардың функциялары

3.1. Архив директоры Журналдың бас редакторы болып табылады.

3.2. Бас редактор:

Журналға жалпы басшылықты жүзеге асырады;

басылымның редакциялық саясаты мен стратегиялық бағыттарын айқындайды;

Журнал туралы Ережені бекітеді;

уәкілетті орган бекітетін Журналдың редакциялық алқасының құрамы бойынша ұсыныстар енгізеді және оны басқарады;

Журналда ғылыми мақалаларды жариялау туралы шешім қабылдайды.

3.3. Бас редактордың орынбасары – ғылыми редактор:

басылымды дайындау мен шығаруды ұйымдастырушылық сүйемелдеуді қамтамасыз етеді;

материалдарды жариялауға ұсыну тәртібін айқындайды;

басылымның ғылыми құрамына жауапты, келіп түскен мақалалардың Журналдың жарияланған ғылыми бағытына, ғылыми мақалаларға қойылатын талаптарға сәйкестігін бақылауды жүзеге асырады;

Журналмен жұмыс істеуге жетекші ғалымдар мен жоғары білікті мамандарды тартуға ықпал етеді;

келіп түскен қолжазбаларға тиісті бейіндегі мамандардың рецензиялауын ұйымдастырады.

3.4. Техникалық редактор:

келіп түскен мақалаларды қабылдауды, тіркеуді және сақтауды жүзеге асырады;

мақалалардың басылым талаптарына және олардың рәсімделуіне сәйкестігін тексеруді ұйымдастырады;

талаптар мен нормативтік құжаттарға сәйкес Журнал нөмірін қалыптастыру және шығаруға дайындау бойынша жұмыстарды жүзеге асырады;

Журналдың шығарылуын ұйымдастырады;

Журналдың электрондық нұсқасын Архив сайтына орналастырады;

редакцияның құжаттамасын жүргізуді жүзеге асырады.

3.5. Редакциялық алқа – мақсаты Журналда ұсынылған ғылыми ақпараттың сапасын қамтамасыз ету болып табылатын тұрақты жұмыс істейтін кеңесші орган. Ол Архивтің, басқа да ғылыми және білім беру мекемелерінің ғылым докторы немесе кандидаты ғылыми дәрежесі бар, журналдың тақырыптық бағыты бойынша Web of Science (Вэб оф Сайнс) немесе Scopus (Скопус) халықаралық дерекқорларында жарияланымдары бар неғұрлым білікті ғылыми қызметкерлерінен, жетекші қазақстандық және шетелдік ғалымдардан құралады.

3.6. Редакциялық алқа:

басылымның тақырыптық бағыттары мен жоспарларын әзірлеуге және бекітуге, нөмірлерді қалыптастыру бойынша ұсыныстар әзірлеуге қатысады;

Журналға келіп түскен ғылыми мақалалардың ғылыми құндылығы мен қоғамдық маңыздылығы тұрғысынан сараптамалық бағалауды жүзеге асырады;

рецензиялау жүргізеді, мақалаларды жариялауға немесе оларды кері қайтаруға қатысты қорытындылар мен ұсынымдар береді.

4. Құрылымы мен мазмұны

4.1. Әр нөмірдің құрылымын Архивтің бейінді құрылымдық бөлімшесі немесе редакциялық алқа ұсынады, оны тақырыптық және практикалық өзектілігіне, сондай-ақ редакция портфеліндегі материалдарға сүйене отырып, бас редактор бекітеді.

4.2. Баспамен үлестес авторлардың ғылыми мақалалары журналдың әр нөміріндегі жарияланымдар санының 70% аспауы тиіс.

4.3. Ұсынылған материалдың көлемі мен әдеби түзетулерді қоспағанда, мақалалардың мәтіндері редакцияланбайды.

4.4. Жарияланған материалдардың мазмұнына авторлар жауапты. Журнал редакциясы авторлардың көзқарасымен әрдайым келісе бермейді және мақалаларда баяндалған деректердің, статистиканың, дереккөздер мен фактілердің дұрыстығына жауап бермейді.

5. Материалдарды жариялауға ұсыну

5.1. Журналда бұрын басқа басылымдарда жарияланбаған түпнұсқа мақалалар ғана жариялануға жатады.

5.2. Мақалаға мәтіннің бірегейлігін тексеру туралы анықтама қоса беріледі, оның деңгейі кемінде 75% болуы тиіс.

5.3. Барлық ғылыми мақалалар тәуелсіз рецензенттер – мақала тақырыбына неғұрлым жақын ғылыми мамандығы бар ғалымдар немесе мамандар тарапынан міндетті жасырын рецензиялаудан өтеді. Рецензиялау нәтижелері бойынша мақала авторға пысықтауға жіберілуі мүмкін.

5.4. Ғылыми мақалалар тегін жарияланады.

5.5. Жариялауға ұсынылған материалдарда мемлекеттік, қызметтік немесе коммерциялық құпияға жататын мәліметтер болмауы тиіс.

5.6. Мақалалар қазақ, орыс немесе ағылшын тілдерінде жарияланады.

5.7. Редакциялық алқа материалдар басылымның бейініне сәйкес келмесе, мазмұндау сапасы төмен болса, сондай-ақ мақалаларды жариялау талаптарына жауап бермесе (Қосымшаны қараңыз), оларды жариялаудан бас тарту құқығын өзіне қалдырады.

5.8. Қабылданбаған мақалалар авторларға қайтарылмайды, бұл ретте мақаланы жариялау немесе жариялаудан бас тарту туралы жазбаша жауап берілмейді.

6. Баспа қызметін қаржыландыру

6.1. Журналды шығаруды қаржыландыру бюджет қаражаты есебінен жүзеге асырылады.

7. Редакциялық саясатқа өзгерістер енгізу тәртібі

және Журналды тарату

7.1. Редакциялық саясатқа өзгерістер мен толықтырулар Архивтің бейінді құрылымдық бөлімшесінің, оның басшысының, редакциялық алқа мүшелерінің ұсынысы бойынша енгізіледі, келісіледі және бас редактор – Архив директорымен бекітіледі.

7.2. Журналдың қызметі құрылтайшының шешімі бойынша заңда белгіленген тәртіппен тоқтатылуы мүмкін.